წინამდებარე ინფორმაცია მომზადდა საქართველოს 2025 წლის სახელმწიფო ბიუჯეტის საბოლოო ვარიანტთან (მესამე წარდგენა) ერთად და წარმოადგენს 2023 წლის ბოლოს 2024 წლის სახელმწიფო ბიუჯეტის კანონზე თანდართული „2024-2027 წლების ქვეყნის ძირითადი მონაცემების და მიმართულებების დოკუმენტით“ წარმოდგენილ საშუალოვადიანი ეკონომიკური და ფისკალური პარამეტრების პროგნოზებთან შედარებით ანალიზს.
2021-2022 წლების ორნიშნა ეკონომიკური ზრდის შემდეგ 2023 წელსაც შენარჩუნდა მაღალი ეკონომიკური ზრდის ტემპი და წლიურმა ზრდამ 7.8% შეადგინა. ეკონომიკურ ზრდაში კვლავ წარმმართველია მოხმარება და ინვესტიციები. ამავე დროს, კვლავ გაგრძელდა ტურიზმიდან მიღებული შემოსავლების ზრდა, რამაც ეკონომიკურ აქტივობაზე კვლავ დადებითი გავლენა მოახდინა. გასულ წელს ტურიზმიდან მიღებულმა შემოსავალმა 26.2%-ით გადააჭარბა 2019 წლის მაჩვენებელს, ხოლო 2022 წელთან შედარებით ზრდამ 17.3% შეადგინა. მიუხედავად ფულადი გზავნილების შემცირებისა, რაც ძირითადად რუსეთიდან შემცირებულ ფულად ჩარიცხვებს უკავშირდება, რუსეთის გამორიცხვით აღნიშნული მაჩვენებელი კვლავ მზარდია.
დადებითი და გაუმჯობესებული მაკროეკონომიკური ტენდენციები გაგრძელდა 2024 წელსაც. პირველ კვარტალში ეკონომიკურმა ზრდამ 8.7% შეადგინა, მეორე კვარტლის ზრდა კი 9.7%-ზე დაფიქსირდა. რაც შეეხება ივლისი-სექტემბრის ეკონომიკურ ზრდას, წინასწარი მონაცემებით, საშუალოდ ეკონომიკურმა ზრდამ 11.1% შეადგინა (1თითოეულ თვეს, შესაბამისად: 3.0%, 12.0%, 8.3%).